Salo di Couloumbo

Lou Felibrige se prepauso de recampa pèr la cinquenco annado, pèr uno journado, tóuti aquéli qu’escrivon vuei en lengo nostro entre Aup e Vidourle.

La Librejado a pèr toco de bèn faire vèire que l’escrituro prouvençalo es quaucaren d’atuau, que lis autour entre-tènon uno literaturo sèmpre drudo. La Librejado baio is escrivan l’óucasioun d’escambia emé lou public, de i’óufri uno bello veirino de l’escri en lengo nostro, de presenta, vèndre e signa sis oubrage.

Lou Felibrige counvido lis escrivan dins lou respèt de tóuti li biais de vèire, de dire e d’escriéure de cadun. I’atroubarés bèn entendu lou banc de la Mantenènço de Prouvènço e d’Armana à bóudre.

Aquéu cinquen rescontre de Librejado, se debanara, lou dimenche 12 de mars 2017, dins la salo « des Colombes » à Tres e noun au castèu coumme aquéli darriés an, sara pamens sèmpre embessouna emé lou « Salon des écrivains de Provence ». Durbira si porto de 10 ouro à miejour e de 2 ouro à 6 ouro de vèspre.

Emé la Librejado, nosto lengo porto la bello provo que pèr sèmpre coungreio de creacioun literàri vo scientifico e qu’a, osco seguro, de resplendi dins li tèms que sian.

Retrouvez toutes les informations du Félibrige ici