RENDU-COMTE DE LA COUMESSIOUN ENSIGNAMEN – FORUM D’OC – SANT-MEISSEMIN – 14 d’abriéu 2018

RENDU-COMTE DE LA COUMESSIOUN ENSIGNAMEN

Demié li participant de la Coumessioun Ensignamen tres soulamen avien deja agu de liame em’un pargue regiounau : moussu Bernat Vaton que travaiè ‘mé lou pargue regiounau di Barounié (qu’es en deforo de nosto regioun) ; moussu Alan Brunaud que prenguè lengo emé lou pargue de Port-Cros (mai tóuti dous an parla dóu gaire d’interès de la part dis elegi). Moussu Reinié Raybaud enfin que nous diguè que l’Escolo felibrenco la Madalenenco de Sant-Meissemin èro assouciado au pargue de la Santo-Baumo.

Moussu Bernat Vaton sugeriguè de marca tóuti li vilajoun di pargue regiounau que soun escolo primàri es estado supremido pèr prepausa i maire de i’stala uno « Calandreto ».

Li participant s’acordon pèr dire que pèr faire quaucarèn fau uno voulounta di poudè publi quente que siegue soun nivèu (dóu maire d’un vilajoun fin-qu’au presidènt de la Regioun) ; souvèton que la letro de moussu Crestian Estrosi fague boulega lis elegi de la Regioun.

Li participant sugerisson que li Pargue Regiounau prevegon d’ativeta periscoulàri (à gratis) e qu’en demai meton sus soun site de ressourço bilengo sus lou bestiàri, lou plantun, l’agriculturo dóu relarg, etc. 

Madamo Gineto Decroocq d’Aubagno e moussu Reinié Raybaud de Sihoun-Font-d’Argèns fan remarca à-n-aquéu moumen que coume que vague fau privilegia l’ourau qu’es essenciau. Fau faire parla li pichot, lis enfant, qu’uno lengo es subre-tout un mejan de coumunicacioun.

D’ùni demandon la creacioun d’OcBi, assouciacioun de parènt d’escoulan que sa toco es la proumoucioun dóu bilenguisme francés-óucitan dins  l’ensignamen publi.

Pèr acaba, es ramenta i mèmbre de la Coumessioun ensignamen que lou prouchan coungrès dóu Forum d’oc se debanara à Niço lou 17 de nouvèmbre 2018 e que faudrié que chascun chifrèsse sus lou tèmo : « Viéure en diversita dins la Regioun,  quente role pèr l’óucitan-lengo d’o ? » e coume respondre à-n-aquelo questioun dins lou doumàni de l’ensignamen, coume crea la moutivacioun dis escoulan, coume douna de sèns à l’aproupriacioun de la lengo, coume n’en faire un óutis pèr basti uno persounalita regiounalo duberto en tóuti.

Lou respounsable de la Coumessioun 

Gile Desecot